Бид корона вирус хэмээх аюултай цар тахалтай нүүр тулан улс даяараа эрвийж дэрвийхээрээ тэмцэж байна. Вирусын тахалаас шалтгаалсан хөл хорионоос улбаатай санхүүгийн хүндрэлүүд эхнээсээ гарч, тэр дундаа жижиг дунд үйлдвэр эрхлэгчдийн үйл ажиллагаанд хүндээр тусч байна. Зарим нам, иргэдийн зүгээс өрх, иргэн бүрдээ сая төгрөг өгөхийг санал болгож, гүйцэтгэх засгийн тэргүүн маань  манайд мөнгө байхгүй гэж мэдэгдлээ.             

 Энэ хэцүү үед ЖДҮ -ийн гэх хэргүүд бүр дарагдах шинжтэй болоод явчихлаа. Уг нь одоо л санах ёстой баймаар. ЖДҮ-ийн хэргээр алга болсон олон тэрбум төгрөг байсан бол эсвэл жинхэнэ ЖДҮ нь аваад хөл дээрээ боссон байсан бол гэсэн бодлууд хөвөрнө. Энд зөвхөн нэг ЖДҮ-ийн хэргийн талаар дурьдая.

“Гранд степ” ХХК. Үржнээгийн Сарнай 2016 онд байгуулсан. ТЕГ-ын дарга асан Б.Хурцын эхнэр. Хүмүүс Сарнайх салоноор  нь мэддэг. ЖДҮХС-аас 1.5 тэрбум төгрөгийг Б.Хурцын эцэг Д.Хурцын нэр дээрх Төв аймгийн Баянчандмань суман дахь гэр бүлийн хэрэгцээний газруудаар барьцаалан авсан байна. 2020 оны 2 сарын байдлаар 1.2 тэрбумын эргэн төлөлт хийгдээгүй, хугацаа хэтэрсэн.

“Гранд степ” ХХК нь ЖДҮХС-аас зээл авах үндсэн шалгуур болох жижиг, дунд Үйлдвэр эрхлэгчээр бүртгүүлээгүй байсан, шалгуур хангахгүй байсан аж.

ЖДҮХС-ын захирал асан С.Төгсбилгүүн АТГ-д дараах мэдүүлгийг өгчээ.  “…”Гранд степ” компанийг мөн Б.Батзриг сайд “Маш онцгой анхаарна шүү” гэж үүрэг чиглэл өгсөн. Тус компани төслийн дутуу материалуудаа Б.Батзориг сайдад шууд өгдөг байсан бөгөөд Б.Батзориг сайд надад дамжуулж өгдөг байсан. “Гранд степ” компаний ямар материал дутуу байсныг санахгүй байна. Ямар ч байсан А-3 хэмжээтэй цаас бүхий том хэмжээний материал өгч байсан санагдаж байна. Тэр компанийг Б.Батзориг сайд Б.Хурц  гэдэг хүнийх гэж байсан бөгөөд би энэ талаар хэнд ч хэлээгүй байхад сангийн ажилтнууд бүгд мэдсэн байсан.  Тэгэхээр төслийн материал дотор Б.Хурц гэх хүнтэй холбоотой мэдээлэл байсан юм болов уу гэж бодож байна” гэсэн байна.

 Төв аймагт “Мах болон сүүний үхрийн эрчимжсэн аж ахуй” байгуулна гэсэн төслөөр уг зээлийг авсан байна.  Хэргийг АТГ-аас тусгайлан шалгаагүй, түүнээс мэдүүлэг аваагүй аж.  Зээл авсны дараа 680 сая төгрөгийг “Бадрах ойл” ХХК -д шилжүүлж, үлдсэн мөнгийг бэлэн болон бусад хэлбэрээр зарлагдсан байна. Ийнхүү Төв аймаг эрчимжсэн малын аж ахуйгүй хоцорч, ЖДҮХС мөнгөө өгөөд алдсан.  Энэ бол зөвхөн нэг л зээлийн бодит байдал. Бусад ЖДҮ ийм хэлбэрээр явагдсан байна.