Монголын хамгийн анхны спорт хувцасны Моnline брэндийн үйлдвэр гэхээр мэдэхгүй хүн, тус брэндийн спорт хувцсаар гангаараагүй хүн цөөхөн  биз.  Тэр дундаа Монгол Улсаа төлөөлж дэлхийн спортод хүч сорьдог бүхий л спортын баг тамирчид  Моnline брэндийн байнгын үйлчлүүлэгч болсныг хэн бүхэн мэднэ.  Тиймээс бид энэ удаагийн сурвалжлагаа Adidas, Nike, Mizuna, Asics брэндийн хувцаснуудтай ижил төрлийн материалаар бүтээгдэхүүнээ үйлдвэрлэдэг монголын хамгийн анхны спорт хувцасны үйлдвэр Моnline-аас бэлтгэсэн юм.

Чанар, материалыг  эрхэм болгон бүхий л бүтээгдэхүүндээ сэтгэлээ шингээж үйлдвэрлэлээ явуулдаг  Моnline үйлдвэр байгуулагдаад удаагүй ч өдгөө монголд төдийгүй дэлхийн зах зээлд  олон хүний сайшаал магтаал, талархлыг хүлээж  чадсан чухал амжилтын эзэд болоод байгаа билээ.  Ингээд  Моnline спорт хувцасны  үйлдвэрийг үүсгэн байгуулагч, ерөнхий захирал А.Чимэд-Очиртой ярилцлаа.

-Сайн байна уу? Танд энэ өдрийн мэнд хүргэе.

-Сайн. Баярлалаа.

-Моnline брэндийн спорт хувцсыг мэдэхгүй, өмсөөгүй хүн монголд ховор болсон. Тэгэхээр ярилцлагаа анх спорт хувцасны үйлдвэрлэлээ хэзээнээс явуулж эхэлсэн. Яагаад заавал монгол брэндийн спорт хувцас хийхээр шийдсэн  гэдгээс эхэлье?

-Тэгэлгүй яахав манай үйлдвэр анх 2012 оноос үйлдвэрлэлээ явуулж эхэлсэн. Би өөрөө бага залуу байхдаа юм оёдог байсан. Тэгээд би сэтгэл  дотроо Монголд брэндийн спорт хувцасны үйлдвэртэй болох юмсан гэсэн нууцхан мөрөөдөлтэй явдаг байлаа. Ер нь хүнд  бодоод л явдаг сэтгэлд үргэлж хадаатай байдаг зүйл гэж байдаг юм шиг. Тэр зүйл маань өдгөө биелэлээ олоод ажил хэрэг болж төсөөлөхийн аргагүй амжилтад хүрсэнд одоо ч итгэж чаддаггүй юм. Анхандаа бол үйлдвэрээ зүгээр л хоббигоороо байгуулж байлаа. Гэтэл биднийг үнэдсний үйлдвэрлэл гэдэг утгаар нь монголчууд маань маш сайхан хүлээж авсан. Миний төсөөлснөөс илүү амжилтад хүрч Моnline брэндийн спорт хувцсаар монгол тамирчид дэлхийд гоёдог болсон. 

- Монгол брэндийн спорт хувцсаар монгол тамирчид маань дэлхийд гоёдог болсон гэж байна. Таны зохион бүтээж үйлдвэрлэн гаргасан хувцсыг дэлхийн дэвжээнд өмсөөд амжилт гаргаад зогсох үед таны сэтгэгдэл ямар байдаг вэ?

- Мөрөөдөл биелэдэг гэдэг үгийн үнэ цэнийг жинхэнэ мэдэрсэн мөч байдаг. Мөрөөдөл маань биелэлээ олж байгааг харахаас өөр аз жаргал гэж юу байхав. Тэр л үед өөрөөрөө хамт олноороо бахархах сэтгэл төрж цаашид илүү ихийг хийж урам зориг эрч хүчийг олж авдаг. 

-Танай үйлдвэрийг Монголынхоо тамирчдыг ивээн тэтгэдэг гэж сонссон. Энэ талаар ярихгүй юу? 

-Манай үйлдвэр  ашгийн төлөө зүтгэдэггүй. Ер нь мөнгөний төлөө үйл ажиллагаагаа явуулаад эхлэхээр тухайн байгууллагын  ирээдүйд сөргөөр нөлөөлөөд ирдэг тал бий. Манайх  волейболын холбооны зүүн өмнөд азийн аваргын бүх төрлийн хувцсыг ивээн тэтгэж байсан. Монгол Улсынхаа нэрийг гаргаад явж байгаа тамирчдаа аль болох дэмжихийг л боддог. Бас заримдаа хэдэн хүүхдүүд нийлээд “Ахаа бид нар тэмцээнд орох гэсэн юм. Байгаа нь энэ байна” гээд хэдэн төгрөг бариад ороод ирнэ. Тэр үед бол  өхөөрдөөд л эх орны минь ирээдүй юм чинь  гээд хийгээд өгдөг. Хааяа урьдчилгаагаа өгчихөөд дараа нь мөнгө бүтсэнгүй ээ ахаа тэмцээн эхлэх гээд байдаг гээд л гуйна тэгэхээр нь өгөөд явуулдаг тохиолдол гарч л байдаг. Хамгийн гол нь бидний хийсэн хувцсыг өмсөөд л тамирчид гадаад дотоодын тэмцээнд ороод алт, мөнгө аваад хүрч ирээд баярласанаа илэрхийлэх нь намайг жаргалтай болгодог. Зарим тамирчид орж ирээд гадаадаас авчирсан чихэр жимс, сэтгүүл зэрэг бэлэг дурсгалын юм өгөөд  баярлалаа гэх нь их сайхан шүү. 

-Танай үйлдвэр дээр орж ирснээс хойш нэлээн олон хүн захилга өгөхөөр ирж байна л даа. Ер  үйлдвэрлэлийн хүчин чадлын хувьд ямар бэ. Өдөрт ойролцоогоор хэдэн хувцас үйлдвэрлэн гаргадаг вэ?

-Манай үйлдвэр 4 эсгүүрчин, 2 индүүчин 10 гаруй оёдолчин 2 туслан гүйцэтгэх компанитай үйл ажиллагаа явуулж байна. Захиалгын ачаалал маш их байдаг. Гэхдээ бид зөвхөн чанарыг эрхэмлэдэг болохоор өдөрт 30 гаруй  биеийн тамирын хувцас л оёдог. Би ажилчиддаа “

Захиалга ихтэй байна гэж битгий яар. Хамгийн гол нь хийсэн хувцас чинь чанартай дээрээс нь хувцас нэг бүрт сэтгэл чинь шингэсэн байх ёстой”

гэж  захьдаг. Энэ л бидний мөрдлөг болгодог зарчим. Тиймээс өнөөдөр олон хүний сайшаал магтаалыг хүртэж монголын зах зээлд төдийгүй дэлхийн зах зээлийн сонирхолд өртөж байгаа байх.

 

-Танай хувцасыг гадны хүмүүс сонирхож байсан уу? Цаашид дэлхийд зах зээлд нийлүүлэх сонирхол байгаа юу?

-Эрхүү Украйн, Швейд, Буриад зэрэг зарим орнуудаас захиалга ирдэг. Норвегаас “Регби”-гийн баг сонирхоод багийнхаа хувцсыг хийлгээд аваад явсан.

- Материалын хувьд ямар материалаар хувцсаа хийдэг вэ? Эрүүл ахуйн шаардлага хэр хангадаг вэ?

- Тэгэлгүй яахав. Спортын хувцас бол хүний биед таарч тохирсон, зохицсон гэхээсээ илүүтэй хамгийн чухал зүйл нь эрүүл ахуйн шаардлага хангах хэрэгтэй байдаг. Бид материалаа Adidas, Nike, Mizuna, Asics брэндийн хувцас хийдэг зориулалтын материалыг гаднаас оруулж ирдэг. Мөн үйлдвэрлэлээ явуулж эхлэхээс өмнө эрүүл ахуйн шинжилгээ хийлгэсэн байгаа.

 - Үнийн хувьд ямар вэ?

 - Бид хүн нэг бүрийн биеийн хэмжээ, загвараар захиалга авч оёдог болохоор харицангуй их зардал гардаг. Ямар төрөл гэдгээсээ шалтгаалаад үнийн хувьд харилцан адилгүй байгаа. ойролцоогоор 95000-115000 мянган төгрөгийг хооронд байдаг. 

- Хүсэл зорилго мөрөөдөл байхад амжилтад хүрч болдогийг амьдралаараа батлан харуулсан таны хувьд залуучууддаа хандаад юу хэлэх вэ? 

- Тэгэлгүй яахав. Хүнд хүсэл зорилго мөрөөдөл байхад ямар ч амжилтад хүрч чадна. Мөн сэтгэл шингээж хийсэн бүтээл хамгийн үнэ цэнэтэй  байдаг. Ер нь ямар ч зүйл хийж бүтээсэн сэтгэл шингээх нь л амжилтад хүргэдэг гэдгийг ухаарч байна даа.