2016 оны 1 сарын 1-нээс, одоо 10 хүрэхгүй хоногийн дотор хэрэгжих Нэмэгдсэн өртгийн албан татварын шинэ хуулиар, иргэдийн төлсөн нэмэгдсэн өртгийн татварын 20 хувийг буцааж олгохоор болсон.  Үүнийг хялбар жишээгээр тайлбарлая.

Та Бурзай дэлгүүрээс 1100 төгрөгөөр талх авлаа гэж бодъё. Үүний 1000 төгрөг нь суурь үнэ, 100 төгрөг нь 10 хувийн нэмэгдсэн өртгийн албан татвар байдаг.

Таны төлсөн 1100 төгрөгт багтаж байгаа 100 төгрөгийн татварын 20 хувь буюу 20 төгрөгийг танд буцааж олгоно.  Өөрөөр хэлбэл та 100 төгрөгийн худалдан авалт тутамдаа ойролцоогоор 1,82  төгрөг буцааж авах боломжтой.  1,82 төгрөг бага сонсогдож байгаа ч жишээ нь сар тутам 2 сая орчим, жилд 25 сая төгрөг зарцуулахад дараа нь  455 мянган төгрөг буцааж авна гэсэн үг. Ерөнхийдөө олон улсын ямар ч дебит, кредит картны хэрэглээний урамшуулалтай харьцуулахад урамшууллын 1,82% нь маш өндөр хувь гэж үзэж болно.

20 хувиа яаж буцааж авах вэ?

Татварын албаны тайлбарлаж байгаагаар шинэ систем бүрэн нэвтэрсний дараа НӨАТ-ын цахим системд бүртгэлтэй картаар тооцоо хийвэл, тооцоо хийсэн даруйдаа буцааж авна.

Цахим систем бүрэн хөгжтөл, эсвэл бэлэн мөнгөөр тооцоо хийсэн бол:

  НӨАТ төлөгч, төлөгч бус бүх аж ахуйн нэгж НӨАТ-ын  системд холбогдоно. Сугалааны дугаартай нэгдсэн талон нэвтрүүлнэ.  Таныг 1100 төгрөг төлөөд талх авмагц Бурзай дэлгүүр НӨАТ төлөгч мөн ч бай биш ч бай танд төлбөрийн баримт, баталгаажсан талон өгөх үүрэгтэй гэсэн үг.  Өгөхгүй бол та –Талоноо авъя гэж нэхээд авах эрхтэй.  

Хэрвээ Бурзай дэлгүүр НӨАТ төлөгч бол та  20 төгрөгөө буцааж авах, бас орон даяар явуулах татвар төлөгчийн буцаан урамшуулах сугалаанд оролцох боломжтой.  НӨАТ төлөгч биш бол зөвхөн сугалаанд оролцох боломжтой.  НӨАТ төлөгч юм уу талон өгдөг дэлгүүрээс авсан нь ашигтай гэсэн үг.

Талоны дугаараа татварын цахим системд бүртгүүлээд, буцаан олголтод хамрагдана.  2016 онд төлсөн татварыг 2017 оны эхний улиралд буцаан олгоно.