Японы автомашины брэнд Toyota, Nissan компаниуд нийт 6,5 сая машинаа эргүүлэн татахаар болжээ. Учир нь машины эд анги үйлдвэрлэгч Takata компанийн аваарын дэрийг солих юм.

Toyota компанийн хувьд 2003 оны 3 сараас 2007 оны 11 сарын хооронд үйлдвэрлэгдсэн Corolla, Vitz болон бусад загварын нийт 5 сая машин, харин Nissan компани 1,56 сая машин буцаан авахаар болжээ.

Тус компаниудын машинтай холбоотой ямар нэгэн осол, аваар мэдэгдээгүй байгаа ч аваарын дэрийн хийлэгчийг шалгаж, солих хэрэгтэй гэж тэд үзсэн байна. Учир нь Takata компанийн хийсэн аваарын дэрнээс болж 6 хүн нас барсан тохиолдол гарчээ. Гэхдээ эдгээр бүх осол Honda компанийн машинд болсон юм.

Toyota, Nissan компаниуд машинаа эргүүлэн татах тухайгаа зарласны дараа Honda компани ч агаарын ууттай холбоотой асуудлаар машинуудаа татна хэмээн мэдэгдэв. Одоогоор Honda компани хэдэн машин татах нь тодорхойгүй байна. Өнгөрсөн гуравдугаар сард мөн л энэ асуудлаар АНУ-аас 100,000 машиныг Honda компани буцаан авч байсан. Харин Takata компанийн аваарын ууттай холбоотой асуудлаар 2008 оноос хойш дэлхий даяар нийт 10 өөр компани 25 сая машинаа буцаан татаж байжээ.